ffermio - Mererid Wigley

Mererid Wigley

Magwyd Mererid Wigley ar Fferm Rhosdyrnog, Talywern ger Machynlleth, ac fe gafodd ei haddysg yn Ysgol Gynradd Glantwymyn ac yna'n Ysgol Uwchradd Bro Ddyfi. Bu'n aelod o Glwb Ffermwyr Ifanc Bro Ddyfi a bu'n cystadlu'n Rali'r Sir, y Sioe Amaethyddol a'r Eisteddfod.

Ymddiddorodd mewn ysgrifennu creadigol tra'n aelod o'r clwb, ac fe enillodd gadair Eisteddfod Sir y Ffermwyr Ifanc dair blynedd yn olynol, pan yn 17, 18 ac 19 oed. Fe barhaodd y diddordeb ysgrifennu tra'n y Brifysgol ym Mangor lle bu'n astudio Llenyddiaeth Gymraeg a Llên y Cyfryngau. Tra yno, fe gafodd gyfle hefyd i weithio'n achlysurol i'r BBC, ar y rhaglenni radio i bobl ifanc, Y Doctor Newyddion ac Y Profiad ac yna, yn cyflwyno'r bwletinau newyddion lleol o Aberystwyth.

Ar ôl tair blynedd yn y Coleg, fe symudodd i lawr i'r Brifddinas i wneud cwrs ôl-radd mewn newyddiaduraeth ddarlledu, ac wedi hynny, fe ymunodd ag Adran Newyddion y BBC. Bu'n gweithio am gyfnod byr ar y rhaglen deledu Newyddion cyn ymuno â thîm Ffeil, y rhaglen newyddion i blant, lle treuliodd chwe blynedd yn gohebu a chyflwyno ac, wrth gwrs, yn cwrdd â channoedd o blant dros Gymru gyfan! Fe wfftiodd y cyngor i beidio â gweithio gyda phlant nag anifeiliaid pan ymunodd â thîm Ffermio yn Ionawr 2005!